福布斯：投資內地要識三件事

【明報專訊】我哋成日聽到外商話要對華投資，咁究竟應該點樣響中國投資先至唔會失敗收場？最近美國《福布斯》就有篇文章教大家對華投資要注意嘅事，十足投資指南一樣。

呢篇題為《在中國投資必須知道的三件事》嘅文章指出，目前響中國投資需要記住3個關鍵趨勢，首先係唔好再考慮勞動密集型行業，因為內地提倡加快上調最低工資，而且人口老化，勞動力愈來愈下滑，令企業勞動成本日益增加，冇咩利潤可言。

其次就係要投資響質量有保證或者內地市民有信心嘅產品，事關內地人對質量問題愈嚟愈重視，而對於有保持嘅產品，貴啲都唔介意，所以呢種企業值得考慮。

最後，文章教大家千祈要小心中檔品牌，因為中國人消費能力日益提高而且走向兩極化，好似買手袋咁，有錢人唔使講啦，就算係一般消費者，佢哋都會一係買LV，買唔起就索性用平貨，永冇中間咁話喎。