STANFORD研究：主管浪費下屬時間３大原因

https://hk.finance.yahoo.com/news/

每日返工，令一眾打工仔女最花時間和心思嘅，好多時並唔係工作，而係應付人事，特別係有個麻煩頂頭上司，就算用盡一日24小時去「服待」佢，都未必可以搞得佢掂。

事實上，最近就有個STANFORD研究指，唔少主管在不經意間，浪費下屬好多寶貴時間，通常由一啲簡單嘅溝通問題造成，主因大致有3個：

1. 作風常變

文中舉例，做主管一年宣告幾次大改工作「新作風」，確會令下屬們無所適從。無Say嘅打工仔女，既要花一段時間重新適應，某些舊項目亦被逼放棄，努力都白費了。但最討厭嘅係，有人為改而改，將工作簡單複雜化，並唔了解自己眼中少少嘅改動，會耗掉下屬好多時間，例如要安排訓練課程及修改相關文件等，變相加重下屬無必要嘅工作量。

2. 隨口點評

研究人員又指，聽過有CEO反映在早餐會上無藍莓鬆餅，其後下屬每朝準備買藍莓鬆餅。事實係CEO根本沒將事情放在心上，藍莓鬆餅本是可有可無，但隨心一句，令下屬感為難，被逼浪費時間去處理無乜必要嘅事。主管少亂說話，下屬就無過分解讀嘅機會，無需猜測老細心意，便可更專心真正嘅工作。

3. 攬事上身

有主管會唔俾員工接手某啲工作，但當公司不斷擴展，做主管嘅，無可能攬太多事上身，因為最終只會拖慢工作進度，要下屬付出ＯＴ代價。

主管要學識放手，按下屬能力指派唔同工作畀佢哋做，才能發揮最大嘅團隊合作精神，高效工作，免得大家「搭沉船」，你說對不對？

來源：Inc