Mind Map願望成真計劃

http://cg.cosmopolitan.com.hk/inner-girl/life-tips/

正所謂「一年之計在於春」，嚟緊嘅大計，你plan好未？身為New City Girls，應該一年比一年進步，keep住將迎接新嘅事物，豐富自己嘅生活。唔想過吓過吓又一年，就要學識畫一幅願望地圖！

What Do You Want?

其實人人都想自己變得更好，例如成日病嘅人想變得健康，懶散嘅人希望變勤力，購物狂想學儲錢，而且好多時，一個人會攬住幾個願望，亦有些人根本唔知自己想點，覺得好lost。不如靜靜哋坐低，搵出自己嘅目標，確保為人生做好對的決定。其中一個簡單方法，就係draft一張願望地圖(Mind Map)。
根據心理學家Tony Buzan所講，願望地圖由一個中心思想，以及一堆關鍵字(Key Words)、顏色圖表及圖畫組成，呢啲視覺影象，可以反映我哋嘅的思緒，但又比較清晰有條理，而且顯示出一啲微妙嘅關連，令我們更清楚知道自己想要乜，同埋往後應該點做。

Mind Map Step by Step

Step 1:安靜20分鐘
為自己騰出安靜的20分鐘，保證自己唔受騷擾，全心專注喺mind map之上。一張願望地圖應該係充滿正能量同七彩繽紛嘅，所以應準備一張大大的A3紙，同埋各種顏色嘅筆。

Step 2: Set好目標
你嘅目標，可以係你想達成嘅事、你想改善嘅項目或者你想搞清楚嘅問題。喺紙嘅中央，畫低你嘅目標，呢度就係願望地圖嘅起點。

Step 3: 描畫分支
由中心開始諗吓相關嘅人同事，將呢啲衍生出嚟嘅想法，畫成一條條分支，就好像一本書有幾個章節那樣，例如地圖的核心是「開心生活」，分支就可能係「朋友」、「家人」、「學業」及「興趣」等。

Step 4: 畫一張「腦震盪」地圖
如果你仲未知自己想點，可以喺中心畫自己個樣，分支可以是「愛情」、「健康」或任何你覺得重要嘅嘢。然後望住呢啲分支，睇吓有咩ideas會喺腦海突然彈出來，然後一一記低，唔好怕傻仔，要信自己嘅直覺。

Step 5: 加多啲字和圖
寫低一啲關鍵字，可以喺旁邊加上得意公仔，亦可以配合字和圖嘅意思，隨意加上分支同細線，例如你其中一個關鍵字是「事業」，相關的字眼便可能是「升職」、「加薪」、「進修」，又或者「自信」、「人際關係」等等。

Step 6: 強化視覺效果
‧圖同字嘅比例無特別規定，唔使畫到天花龍鳳，簡單嘅火柴公仔就可以。
‧將ideas用數字或字母排好次序，有助排好每件事嘅重要性。項目與項目之間留一啲空間，俾你嘅思想和感情唞吓氣。
‧波浪紋的線比直線得意，亦令人留下更深刻印象。
‧你可以用一些自家「暗號」，例如剔、交叉、星星、箭嘴、心心等，等自己更容易聯想。

CG! Reminds U

你想達成的願望，唔一定係一年之內嘅大事，可以係1個月或1星期內想做到嘅小事情，例如plan一個日本短trip。只要你將自己放喺正中央，任由思想、感覺引伸出嚟，就會客觀咁睇到自己內心所想同潛藏嘅願望。一幅mind map，就反映真正嘅你嘅一面鏡子，細心睇睇，邊一條分支最茁壯？分支指向邊個方向？分享俾朋友知，等佢哋支持你，成功自然在望。