Samsung Note 7終於宣佈全球停用，可算係電話史上、甚至電器史上罕見嘅「大災難」，估計損失高達百多億美元！今次事件，最多人（尤其係香港人）歸納出嘅原因唔係咩電池問題、QC問題，而係改壞名！中國人一向都話「唔怕生壞名，最怕改錯名」，人名如是，產品亦如是。例如今次電話事件已經係好佳嘅一個例子，所以真不得不信邪。一於睇下中外有咩產品改壞名啦。
Note 7
Samsung Note系列一出場時，講真無人預計過佢會出到第7代，直到今年一出新機時，香港用戶都嚇一跳，然後得啖笑。Note 7呢個名令到廣大香港媒體，無論電視定電台都被迫要全英名讀，更一直引出無數笑話，最後因後爆炸而回收，可謂沒有最Note 7，只有更Note 7 ！
摩利士
相信宜家知道呢個牌子嘅人絕對少之又少，因為呢個係香港50、60年代進口嘅英國汽車牌子，當時汽車絕對係少數富豪先可以擁有，不過摩利士從一開始進口香港已經銷情慘淡，原因就係名字諧音「無利是」，對於當時思想傳統嘅香港人，真係唔慌唔「大吉利是」喇。
SARS
提起沙士，邊個唔驚先？呢隻汽水自19世紀已經出現，可算係最早前嘅汽水之一，係用墨西哥植物作為原料。細細個一定有飲過，但隨住時間開始被淘汰，加上2003年沙士一疫，令汽水都改名成「沙示」（台灣仍然叫「沙士」），宜家想搵嚟飲都唔係咁易。
Wii
任天堂第一代體感遊戲主機，不過個名古怪又難讀，而且英文名字Wii更同「小便」嘅Wee同音，尤其Wii嘅對象係年齡偏細嘅小朋友，由大人口中講話玩Wii，好尷尬哦。
iPad
2010年蘋果宣布推出平板電腦並命名為iPad，由於英文嘅Pad係解作護墊，所以當時都被人訕笑過一陣，更有女性護墊公司搶先iPad推出之前推出同名產品抽水。不過蘋果光環太勁，經過咗咁多年，成功轉移大家對「Pad」嘅定義喇。
No comments:
Post a Comment