5小時4個記招 政府整蠱傳媒？

http://hk.news.yahoo.com/article/100813/4/joij.html

(明報)2010年8月14日 星期六 05:10

【明報專訊】對於政治記者來說，噚日絕對係黑色星期五。以往政府高官經常半開玩笑咁話，如果有咩政治爛攤子，最好係等8號風球，或者有咩死人塌樓先推出嚟，等傳媒應接不暇。由於頭版只有一個，而一般報紙嘅社論，每天亦只會討論一個題目，因此「負面新聞」若然喺同一日推出，自然會有「排擠效應」。這樣一來，「負面新聞」的社會效應便可以降至最低！噚日，政府明顯咁用上咗這一招。

掩飾政治爛攤子？

噚日由中午開始，政府先拋出幾個「爛攤子」，打頭陣係廣管局 就民建聯 個商台 贊助節目《十八仝人愛落區》裁決結果，判定商台違反廣播條例；之後唔夠15分鐘，政府又再發新聞稿公布香港電台 個「太上皇」──顧問委員會名單。

兩單都仲未夠，兩點半再公布副局長、政治助理薪酬檢討結果，全部一律凍薪。傳媒已經頭痛緊用邊個做頭條之際，政府再嚟個最後一擊，由財爺出嚟公布新一輪遏抑樓價炒風措施。可能之前記協投訴過政府只搞「吹風會」唔開記者會，噚日政府就一反常態，5個鐘頭內幾單公布都搞個記者會，搞到Emily嘅同事由中午開始駐守政府總部，到傍晚6點先可以走！

林瑞麟 ：時機成熟就公布

噚日有記者嬲得滯，問政制及內地事務局長林瑞麟係咪特登玩傳媒，定係想淡化邊單新聞？佢就話無咁嘅事，只係副局個薪酬檢討搞咗成3個月，時機成熟就公布囉！

另外，煲呔曾噚日幫《施政報告》收風，會見傳媒高層，臨行嗰陣佢拎住部iPad，話自己已經養成一個習慣，就係喺部iPad度睇晒所有報紙。如果要收費嘅就由政府支付，但日後佢退休就唔會「買」齊咁多份啦。特首言下之意，係要提醒傳媒都要應付新形勢，如果唔係好快畀人淘汰啦！