近幾年廉航興起，窮遊旅行逐漸成為越來越多人嘅選擇，其實無論係咪窮遊都好，去旅行可以慳到錢相信都係大家嘅最終目標，除咗慳錢之外，方便當然都係唔可以忽略嘅因素。講到去旅行慳錢又方便嘅方法，除咗搭廉航，住青旅呢啲安排上，其實有好多小細節都要留心，好似以下呢五個方法，就可以幫大家不知不覺慳到好多之餘又方便。
1.少量內衣褲跟身
雖然航空業發展都好成熟，但不時都會發生啲行李延誤或者寄失嘅情況，所以記得要將一兩套內衣褲放喺隨身行李，就算遇上突發情況都有得替換，而且免卻臨急臨忙買好貴又未必啱身嘅情況。
2.酒店補給好時機
住酒店就係獲得補給嘅好機會，好似係酒店會提供旅行裝嘅沐浴露同洗頭水等，仲有免費嘅即沖咖啡同茶包，可為自己稍作補給。
3.水樽永遠跟身
去旅行好多人都要買水，其實係好多地方當你係餐廳用膳，佢哋都可以幫你免費加水，所以帶着水樽出去就可以慳返買水嘅錢又環保。
4.衣服包易碎品
好多時去旅行買手信嘅時候都會買到一啲易碎物品，但就因為擔心運送途中會打爛而唔敢買，或者要另外搵方法買一啲可以保護易碎物品嘅包裝。其實只要用幾件衫包住，然後放喺行李嘅中間位置，唔需要再用其他嘢包已經係最好嘅保護。
5.萬用密實袋
去旅行嘅時候，密實袋可以話係我哋最好嘅朋友，無論喺機場沖完涼需要裝住濕毛巾，定係護照同埋當地嘅散紙，或者係搭搭吓暈車浪想嘔，有咗佢係身邊絕對可以以備不時之需。
No comments:
Post a Comment