出晒名乾淨整齊嘅日本最近似乎都覺得自己地方嘅乾淨不再，尤其是係機場嘅廁所，於政府就好有諗頭咁專登拍左條片教遊客點樣去廁所，內容講到廁所有分唔同style ，如果用坐廁嘅話，有龍捲風式同相撲式，如果係蹲廁嘅話都有大象式同馬尾式，唔知大家又用開咩式呢？
總之兜個圈叫大家遵守同尊重日本的廁所文化。然而，除咗呢四個坐姿外，日本的廁所文化你又知幾多？以下就等我小編教大家七個係日本去廁所一定要識嘅小常識。
1. 自動洗pat pat 功能
相信香港人對於日本廁所有自動射水幫你洗pat pat 呢個功能都唔會覺得陌生，不過唔知大家又有冇真係用過呢？其實日本大部分廁所都設有呢項功能，等你辦完「大事」之後可以舒舒服服咁洗乾淨個八月十五，洗完之後仲有暖風幫你吹番乾，舒服之餘又環保，注意佢地的廁所水唔同我地香港，係用淡水的，所以大家可以放心。
2. 女性獨有流水音設施（音姬）
其實呢項設施真係幾好用架，好多時候女士去小便嘅時候都會覺得俾人聽到自己嘅小便聲好尷尬，而流水音設施可以用流水嘅聲音遮蓋住小便聲，就算你同朋友一齊去廁所都唔使尷尬啦。
3. 電話專用廁紙
係呢一個機不離手嘅時代，電話每日真係黐住好多細菌， 日本嘅廁所最近就推出左電話專用廁紙服務，用法好簡單，只要將佢拉出來揀啱適當嘅長度，再撕落嚟摺一摺就可以抹乾淨你嘅電話。上面仲要印有Wi-Fi 資訊，真係想唔用都幾難。
4. 小朋友私家廁所
日本大部份嘅公眾地方例如百貨公司，都會另外為小朋友分設兒童廁所，入面所有嘅設施都係根據小朋友嘅size 而設計， 等佢哋用都用得舒服啲，而且如果同媽咪一齊去女廁成日都要等好耐，有咗兒童廁所就唔使煩啦。
5. BB櫈
日本大部份嘅公共廁所入面都會設有BB櫈，等媽咪去緊嘅廁所嘅時候小朋友可以坐定定喺度等，完全係貼心度一百分。
6. 緊急呼救制
日本大部份嘅公共廁所每一格入邊都會設有緊急呼救制，如果用家喺佢去廁所途中發生意外可以隨時呼救，就算係長者獨自去廁所都唔使擔心，令大家去廁所都去得更安心。
7. 便利店廁所勿亂用
去到異地有時人有三急想搵廁所都真係幾難，所以好多時大家見到廁所就會即刻忍唔住要用，好似商場啊公廁啊呢啲梗係冇問題啦。不過如果大家去到日本想係便利店度去廁所， 記要望清楚門口個牌係咪寫住「自由使用」，如果係寫住「要先請示員工」就記得要問咗人哋先呀，亦有可能有啲便利店嘅廁所係「禁止使用」嘅。呢個時候無論幾急都好，千祈唔好衝入去，如果唔係隨時俾人告擅闖私人地方，監都有得你坐架。
No comments:
Post a Comment