《施政報告》2012

http://www.sonpou.com.mo/ 轉載 訊報: 舜小記2011.11.19

大眾媒體（例如報紙）監督政府係第一要務，係必須首先要履行社會責任。但係馬交報紙就好怪雞，好似有份報紙竟將為政府擦鞋作為第一要務，第二項要務就係顛倒黑白、誤導公眾。

日前，崔特首發表二０一二年度施政報告，明明係派糖公佈，冇新意、冇前瞻性，只係堆砌概念、口號、文筆又差，不知所謂……。但馬交第一擦鞋報竟然話施政報告創意十足，文字好到不得了，仲批駁批評者，話施政報告創新不足完全唔係事實。事實係「施政報告光是文字寫作技巧上，就顯得有所創新。……無論係觀點提煉、邏輯運用、綱目歸納，還係文字精簡、暢順乾淨等方面，都有令人眼前一亮的感覺」。仲話施政報告「貫穿著一條科學決策、民主決策的紅線。」真係胡言亂語得人驚。

所謂文字寫作功夫比前大有進步，文字精簡暢順，「令人眼前一亮」。小記就完全感受唔到，相反係，睇施政報告，睇到我厭厭欲睡，完全冇「眼前一亮」感覺喎。

該擦鞋主筆仲話《施政報告》貫穿著一條（科學決策、民主決策）紅線，根本非常誤導?。老朽翻來復去查閱施政報告，根本就冇發現甚至紅線（或黑線）咁神奇，因為成本施政報告係用膠漿黏合，唔係線裝書用甚麼紅線（或黑線白線）來釘裝、貫穿、組合也。

《施政報告》寫得差，當然唔單小記個人感覺，好似《時事新聞報》主筆就有咁話：「總體而言，施政報告的文本一年不如一年，許多領域的施政決策蜻蜓點水，流於口號及概念形式，整體構思上既缺乏宏觀政策敘述，又無微觀解決方案，沒有考慮政策的組合式、系統化和成長性，難以令民眾有興趣、有信心展望政策前景。特別是對於一些社會民生問題，總是年年停留在被動尋求解決一時之急的層面，譬如，住房政策今年完成經屋立法，明年完成萬九公屋計劃，隨後又是六千三公屋儲備，但始終就是不以長遠的整體規劃，令居民從恒定的政策中看到未來願景。」（《時事新聞報》．二０一一．十一．十七）