2011-09-18

中國傳統結婚敬茶儀式-大妗姐的吉利說話


斟茶及飲茶時
飲過新抱茶,富貴又榮華。
飲過新娘茶,靚過林青霞。
飲過新郎茶,型仔過劉德華。
飲過新人茶,發到笑ka ka。
飲過新人茶,發到笑哈哈。
飲過新人茶,開心到笑ka ka。
飲過新人茶,子孫聽晒話。
飲過新抱茶,出年做嫲嫲。
飲過新抱茶,生個孫仔四圍爬。
今年娶新抱,出年有孫抱。
一杯飲到尾,青春又健美。
飲過新抱茶,好快做嫲嫲。
飲茶笑呵呵,好快做婆婆。
飲茶笑騎騎,好快做爺爺。
飲茶飲到尾,年頭靚到落年尾。
茶到口,財到手,財神走到大門口。
茶到口,財到手,半山買多幾層樓。
茶到口,財到手,出年又飲滿月酒。
茶到口,越來越正斗。
飲深D,賺多D,中完孖寶中三T。
飲深D,等你買多幾個LV。
飲深D,生多D。
飲過新娘/新郎茶,靚過阿嬌阿SA。
斟茶比姨丈,買六合彩中頭獎。
一杯飲到尾,修身又健美。
茶到口,財到手。
茶到口,財到手,買田又買樓。
茶到口,財到手,買車又買樓。
茶到口,財到手,富貴榮華一齊有。
茶到口,甜到漏。
飲深D,賺多D。
飲深D,中三T。
香茶到口,添福又添壽。
甜茶飲到尾,青春又健美!
甜茶到口, 兒孫快有!
三杯到口,明年飲姜酒。
飲茶到口,橫財就手。
飲茶到口,得心又應手。


戴金或飾物時
戴起大囍,年年有喜,新郎哥養得起。
戴起大囍,戴到上手臂。 
戴起大囍,好快有新己。  
戴過金手鍊,有錢又有面。
戴過金戒指,生個金童子。
戴過金頸鍊,個個都比面。
戴過鑽石戒指,出入渣波子。
金扼帶上,三年抱兩。
金扼夾到手,BB好快有。
戴起金器,大喜大喜。
戴起大囍,新娘好快有囍。
戴起大囍,戴到風生水起。
戴起大囍,戴到兒孫滿地。
戴起大囍,戴到金銀遍地。
戴起大囍,保你家肥屋潤笑嘻嘻。
戴金戴喜,風山水起。
戴過金介子,好快生對金童子。
金摙帶上頸,明年住山頂。
金扼夾到手,好快買車又買樓,美金都到手。
金介戴上,三年抱兩。
戴個大金牌,一世唔洗捱

~~~~~~~~~~~~~~~~~~~~~~~~~~

大婚當日,新娘的父母為女兒穿裙褂時候,大妗姐會先將褂衣的拉鏈拉開、褂裙鬆開,父母先將褂裙由上為新娘穿上,此時大妗姐會誦唱:

「姑娘穿上綾蘿裙,好帶兒孫一群群;爸爸拉上同心鍊,由年頭好到落尾;媽媽扣上鴛鴦扣,兩心緊扣永不分。」

接 著,父母替新娘由上穿上褂衫,大妗姐會誦唱:
「姑娘穿上龍鳳褂,富貴吉祥又榮華;爸爸扣上如意扣,珠聯壁合,成雙成對永不分。」

然後,父母為新娘穿上繡花 鞋,父親左邊;母親右邊,而大姐會唱著:

「姑娘着起綉花鞋,富貴榮華齊同來,一隻富貴,一隻榮華。」

最後,父母一同雙手搭在新娘上,大妗姐會唱:

「全套嫁 衣都穿上,鸞鳳和鳴永不分。今日覓得如意郎,兩家富貴萬千年。」

有關婚禮習俗:
http://bbs.cantonese.asia/thread-26976-1-1.html

No comments:

Post a Comment

Search This Blog

About Me

A tiny dust in the universe.